Парите од четвртиот пакет антикризни мерки ќе се исплаќаат директно на трансакциски сметки

Ранливите категории на граѓани и пензионерите со ниски примања средства од помошта во рамки на четвртиот пакет мерки ќе ги добиваат директно на трансакциски сметки, а не на платежни картички како што беше претходно.

Владата претходно го усвои законот со кој на ранливите категории ќе им се доделат 6.000 денари, како дел од антикризните мерки од четвртиот пакет на мерки. Станува збор за околу 26 милиони евра кои ќе им бидат распределени на околу 300.000 граѓани на нивните трансакциски сметки, а кои ќе бидат наменети за купување домашни производи.

Целта на ваквата одлука, како што информираа на денешната прес-конференција министерот за финансии Фатмир Бесими и директорката на Управата за јавни приходи, Соња Лукаровска, е да се намалат турканиците на шалтерите, со што ќе се придонесе за грижата за здравјето на овие лица во услови на ковид кризата.

Бесими појасни и дека на овој начин ќе се поедностави начинот на испаќање на средствата од помошта, а воедно ќе се намалат и трошоците кои би биле потребни за изработка и издавање на нови картички.

Одговарајќи на новинарско прашање околу компаниите што ги злоупотребија помошта исплатена од државата за своите вработени, Лукаревска информира дека постапката против нив е во тек и дека Јавното обвинителство побарало дополнителни докази во спроведувањето на истрагата.

Таа нагласи дека на сите компании што не ја исплатија доделената дополнителна помош на своите вработени, УЈП им ги блокирала сметките и на дел од нив веќе им биле повлечени овие средстава од државната помош.

Според Лукревска, имињата на сите компании што ја злоупотребуваат помошта и натаму ќе бидат објавувани, со цел јавноста да ги знае, а воедно и да се поттикнат другите фирми да не прават вакви злоупотреби.

„Мерките за задржување на работните места се дел од четвртиот сет антикризни мерки. Со Законот за финансиска поддршка на работодавачи погодени од здравствено-економската криза предизвикана од COVID-19, се овозможува исплата на плати за секој вработен за месеците октомври, ноември и декември 2020 година, во износ најмногу до 21.776 денари. Постапката за добивање на оваа финансиска поддршка се остварува со поднесување на барање за финансиска поддршка преку системот Е-даноци на УЈП, најдоцна до 10-ти овојмесец за октомвриската плата, а за другите исплати најдоцна до 10-ти во месецот за претходниот месец. УЈП по ова барање ќе одговори дали истото е комплетно или не, во рок од три дена од доставување на барањето“, рече Лукаревска.