Една нова студија открива дека кафеавата пастрмка може да стане зависна од мали количини метамфетамин што завршува во нивната слатководна животна средина.
До овој заклучок дошол тим чешки научници во навидум невообичаена студија. Откриено е дека остатоците од дроги, како метамфетаминот или crystal meth, ги загадуваат реките ширум светот, како што е случајот со „легалните“ хемикалии, од детергенти до остатоци од лекови на рецепт.
Метамфетаминот е хемикалија која предизвикува брза и силна зависност и во овој случај продира во мозокот на рибите и функционира на ист начин како кај луѓето. Познато е дека внесувањето на оваа дрога предизвикува непосредна и интензивна еуфорија која не трае долго, што резултира со тоа корисниците за кратко да побараат уште. По продолжена употреба, оваа дрога предизвикува вознемиреност, конфузија, несоница, промени во расположението и насилно однесување.
„Зависноста од дрога кај дивите риби може да биде уште еден пример за неочекуван притисок врз видовите што живеат во близина на урбаните области“, напиша коавторот на студијата Павел Хорко од Чешкиот универзитет за природни науки во Прага.
Тие изолирале голем број пастрмки во резервоар со вода „збогатена“ со исто ниво на метамфетамин што се наоѓа во некои реки. По осум недели, рибата беше префрлена во нов резервоар со можност да оди во оддел што содржи чиста вода или во оддел „збогатен“ со дрога. Научниот тим утврдил дека пастрмките станале зависни по два месеци, дека барале дрога по отстранувањето од такво опкружување, односно избирале вода збогатена со метамфетамин и почнувале да се однесуваат поинаку поради апстиненциска криза.
Откако биле префрлени во чиста вода, во мозокот на рибите имало присуство на метамфетамин уште 10 дена.
