Откако се врати на престолот на Пеколот на крајот на минатата сезона, Луцифер се чини заврши со неговиот мал излет на Земјата и решавањето криминални случаи со полицијата на Лос Анџелес.
Но, сѐ се врти во круг, па и нашиот омилен паднат ангел ќе се врати, порано или подоцна. Само овојпат, во „малку изменета верзија“.
Netflix го објави првиот трејлер за петтата сезона на „Lucifer“ со голем, интригантен спојлер – несуптилно претстави една од најголемите фигури во Библијата и ја стави на пат на нашиот (анти)херој.
Луцифер кој ќе го гледаме во почетокот на петтата сезона воопшто не е Луцифер, туку неговиот брат близнак - Архангел Михаил – кој доаѓа на Земјата за да предизвика хаос во семејството на омразениот брат.
Тој си ја „игра улогата“ и ѝ се приближува и на Клои, но нешто не е како што треба.
Неговиот план е „да му го одземе животот на Луцифер на Земјата“, но трејлерот не открива која е крајната цел. Ок, еден спојлер е доволен.
Откако Fox ја откажа серијата, Netflix ја презеде и направи четврта и петта сезона, а неодамна ја обнови и на шеста.
Ќе видиме како ќе се одвива приказната кога Netflix ќе го објави првиот дел од петтата сезона на 21 август.