Битолчани се согласија да ја поместат пресметката со Силекс два дена порано за кратовчани да имаат повеќе време да се одморат пред настапот во квалификациите од Лигата на шампиони.
Наместо в недела, дуелот помеѓу Силекс и Пелистер од 2. коло во новата сезона од македонската Прва лига ќе се игра в петок од 17 часот. Силекс побара, а Пелистер се согласи, по што и ФФМ го официјализираше новиот термин.
Ова барање на кратовскиот клуб се должи на тоа што УЕФА им го закажа за вторник натпреварот од првото квалификациско коло од Лигата на шампионите кој Силекс ќе го игра против азербејџански Карабаг и тоа на гостински терен. Натпреварот е со почеток од 18 часот по македонско време (20 по локално), а ќе се игра на „Тофик Бахрамов“ стадионот во главниот град Баку.
Силекс и Пелистер забележаа победи во воведното коло од 1.МФЛ. Битолчани ја изненадија Академија Пандев славејќи со минимални 1:0, додека Силекс со фуриозно второ полувреме ја прегази Беласица на гости со 0:6.
Останатите натпревари останувата според првичниот распоред: в сабота од 17 часот играат Работнички - Беласица, а останатите двојки се играат во истиот термин в недела.
