Пендаровски се вакцинираше во Куманово: Сите вакцини се ефикасни

Претседателот на државата, Стево Пендаровски, денеска ја прими првата доза од вакцината против COVID-19 во здравствена установа во Куманово.

На новинарско прашање, тој одговори дека вчерашниот термин во Скопје не го искористил бидејќи бил на службен пат закажан претходно.

„И без тоа, уште од поодамна решив заедно со други членови на Кабинетот кои се од Скопје, да се вакцинираме во некој друг град во Македонија, затоа што има и такви шпекулации, такви дезинформации дека наводно едни вакцини се даваат во Скопје, други вакцини се даваат во градови. Да ја разбиеме таа шпекулација... Сите вакцини што доаѓаат во земјава се проверени, сите тие се ефикасни, и не треба да имаат никаков сомнеж, треба што побрзо да го направат тоа, бидејќи повеќе од една година сме практично како во затвор и добро е што побрзо да се враќаме во нормала“, рече Пендаровски.