Тренерот на Манчестер сити, Пеп Гуардиола, жали за пропуштената шанса неговиот тим да обезбеди пласман во финалето на Лигата на шампионите до кое го делеа неколку минути.
Сити синоќа загуби на госувањето кај Реал Мадрид со 3:1 по дополнителни 30 минути, откако основните 90 завршија со 2:1, а вкупниот резултат беше 5:5.
„Бевме блиску, но на крајот не се пласиравме во финалето. Сè е едноставно. Во првото полувреме не одигравме доволно добро, но немавме посериозни проблеми. По постигнувањето на нашиот гол одигравме подобро. Го најдовме нашето темпо, нашата игра, играчите се чувствуваа удобно. Реал во последните 10 минути нападна со сите сили, а ние настрадавме. Многу од нивните играчи влегоа во шеснаесетникот, меѓу кои Милитау, Родригу, Винисиус, Бензема. Нафрлија и погодија двапати. Не ја прикажавме нашата најдобра игра, но тоа е нормално, бидејќи е полуфинале. Играчите го почувствуваа притисокот и сакаа да успеат. Фудбалот е непредвидлив. Треба да го прифатиме. Треба да се преиспитаме и да се вратиме назад. Имаме уште четири натпревари пред нас во домашното првенство, изјави Пеп.
Каталонецот по шести пат е елиминиран во полуфиналето на Лигата на шампионите со што го повтори антирекордот на Жозе Мурињо.