Претседателот на Реал Мадрид, Флорентино Перес, и првиот човек на ФИФА, Џани Инфантино, ќе седнат на преговарачка маса за да одредат некои од многу важните точки на заедничката соработка.
Според шпанските медиуми, на средбата ќе има неколку важни теми, но се издвојуваат двете најважни - учеството на Мадрид на Светското клупско првенство во САД следната година, како и потенцијалната одлука за одигрување на финалниот натпревар на Мундијалот во 2030 година на стадионот „Сантјаго Бернабеу“.
Актуелните шампиони во Лигата на шампионите во изминатиот период во неколку наврати, предводени од тренерот Карко Анчелоти, изјавија дека не им се допаѓа форматот на Светското клупско првенство во кое не се знае точната распределба на финансискиот колач, па се заканија дека нема да учествуваат во тој проект.
ФИФА е свесна дека без клуб од толкава големина како Реал Мадрид натпреварувањето не би било многу интересно, па челниците на светската куќа на фудбалот се подготвени да седнат и да ги слушнат барањата на мадриѓаните.
Исто така, како што пренесуваат шпанските медиуми, Реал смета дека финалето на Светското првенство во 2030 година, кое речиси сигурно заеднички ќе го организираат Мароко, Португалија и Шпанија, треба да се игра на реновираниот стадион „Сантјаго Бернабеу“, додека исти амбиции имаат и Мароканците, но и претставниците на локалната власт во Барселона.
