Мисијата на НАСА на Марс, поточно роверот Perseverance, продолжи со истражување на оваа планета, а овојпат агенцијата објави информација дека роверот стигнал и до кратерот Језеро.
Локацијата на работ на кратерот го доби името „Lookout Hill“, а Perseverance пристигна таму по неколкумесечно искачување. Ова е исто така првпат оваа локација да биде истражена како дел од мисијата.
Искачувањето траеше околу 3,5 месеци, а должината беше 500 вертикални метри. Во таа прилика, роверот се искачи на наклон од 20 проценти и застана на патот за научни набљудувања.
„За време на искачувањето до работ на кратерот Језеро, нашите возачи на роверот завршија одлична работа „водејќи битка“ на некои од најтешките терени што сме ги сретнале од слетувањето“, рече Стивен Ли, заменик-менаџер на проектот Perseverance во Jet Propulsion Laboratory на НАСА во Јужна Калифорнија.
Од слетувањето на Језеро во февруари 2021 година, Perseverance заврши четири научни мисии. Во текот на првата година од кампањата Northern Rim, се очекува роверот да посети дури четири локации од геолошки интерес, да земе неколку примероци и да вози околу 6,4 километри.
„Овој дел од мисијата ја означува нашата транзиција од карпите што делумно го исполнија кратерот Језеро формиран од масивен удар пред околу 3,9 милијарди години до карпите длабоко во внатрешноста на Марс кои го формираа работ на кратерот по ударот“; изјави проектниот научник Кен Фарли.
Клучна цел на мисијата на Perseverance на Марс е астробиологијата, вклучувајќи собирање примероци кои може да содржат знаци на древен микробиолошки живот. Роверот ќе ги дефинира геологијата и климата на планетата за да помогне да се отвори патот за човечко истражување на Црвената планета.
