Роверот на НАСА повторно се запиша во историјата. Роботското возило претвори јаглерод диоксид од атмосферата на Марс во кислород, што е прв таков случај на друга планета.
„Ова е пресуден прв чекор во претворање на јаглерод диоксид во кислород на Марс, рече вчера Џим Ројтер, еден од помошниците директори на НАСА.
Технолошката демонстрација се случи на 20 април, а НАСА се надева дека идните верзии на експерименталниот систем ќе му помогнат на човекот еден ден да користи трансформиран кислород од Марс.
Ова може да им помогне на астронаутите кои би оделе на мисија на Марс да избегнат носење поголеми количества кислород за потоа да се вратат на Земјата.
Експериментот е извршен со помош на специјалниот уред The Mars Oxygen In-Situ Resource Utilization Experiment (MOXIE), што е, всушност, налик на кутија со големина на акумулатор, сместен на предната страна на роверот.
Користи електрична енергија и хемиски процеси за да ги оддели молекулите на јаглерод диоксидот, правејќи кислород од една страна и јаглерод моноксид од друга страна.
Во првиот обид MOXIE произвел пет грама кислород, што е доволно астронаутот да дише 10 минути во нормални услови.
Инженерите на НАСА ќе спроведат дополнителни тестови и ќе се обидат да го зголемат производството.