За да не се разочарате или изнервирате од одредени ситуации, пред да патувате во Шпанија е најдобро да се информирате за различните културолошки навики.
На што треба да обрнете внимание?
Шпанците имаат лежерен пристап кон времето, ако случајно ве повикаат на кафе или забава никој нема да се налути ако задоцните 15 минути или уште подобро – половина час. Но, ако се појавите на време, очекувајте дека ќе бидете први гости.
Од ракување со бакнување во двата образи, Шпанците се поздравуваат срдечно како нас. Иако сега одржуваат дистанца поради коронавирусот, сепак е добро да го знаете ова кога ситуацијата ќе се врати во нормала.
Во бројни шпански барови со пијалак ќе добиете и мезе како мини сендвичи, маслинки, кашкавал, грицки и слично. Немојте да се грижите дека ќе ви ги наплатат, одат гратис со пијачките.
Шпанците не се шетаат во костими за капење по улици, односно надвор од плажа. Ако сакате да се вклопите, најдобро е да се облечете за да избегнете непријатни ситуации.
Освен што ги ценат туристите кои зборуваат шпански јазик, полесно ќе ви биде да се снајдете ако познавате барем неколку зборови од нивниот јазик. Корисни зборови на листата се поздравите како „ола“ (здраво), потоа „грасијас“ (благодарам), „пор фавор“ (ве молам) и слично.
