Стратегот на Милан е изненаден од лошото издание на неговиот тим кој добрата серија ја прекина синоќа во Лига Европа.
Милан беше во одлична серија од 24 натпревари без пораз. Последен пат горчината на поразот ја имаше почувствувано на 8 март, последниот натпревар пред паузата е поради пандемијата, кога со 1:2 загуби дома од Џеноа кога нашиот Пандев во 7. минута го најави поразот на „Росонерите“. Синоќа во рамките на 3. коло од Лига Европа среде Милано со 0:3 се радуваше француски Лил.
„Нѐ пресретна еден силен тим, а и сами си ја искомплициравме работата после добриот почеток. Екипата на Лил е брза и физички подготвена. Кога се најдовме во негатива почнавме и премногу да им подаруваме. Генерално, мислам дека можевме да создадеме многу повеќе шанси. Сега ќе почнеме одново анализирајќи ги позитивните и негативните работи од натпреваров, но реално, ќе има повеќе негативни. Не го дадовме максимумот, остававме премногу празен простор“, рече Пиоли.
„Не направивме грешки во подготовката за натпреварот. Еден зрел тим мора да најде начин да се издигне по ваков пораз. Во првото полувреме ја држевме играта, но не бевме добри во завршницата, бевме непрецизни. На 0:2 веќе стана тешко и од психичка гледна точка“.
Со овој пораз Милан падна на второто место со 6 бодови, а токму Лил го презема врвот со 7. Трета е Спарта со 3, а последен Селтик со само бод.
Пиоли беше прашан за реакцијата на Ибрахимовиќ кој гестикулираше и негодуваше кога беше заменет во 71. минута кога веќе беше 0:3. Медиумите на Чизмата шпекулираат дека не сакал да излезе од игра, но Пиоли има поинакво мислење.
„Мислам дека не беше задоволен од тоа што го одигра, не знам што рекол“.
