„Росонерите“ направија голем чекор кон обезбедување на место во Лигата на шампионите со победата над Јувентус, но далеку од тоа дека работата е завршена бидејќи има уште три натпревари до крајот.
Веќе утре Милан го чека нова битка и тоа повторно во истиот град. Милан пак оди за Торино каде овој пат ќе му се спротивстави на другиот клуб од пиемонтската престолнина, тимот на Торино кој грчевито се бори за опстанок.
„Мора да држиме баланс. Исто како што не се демотивиравме после Лацио, не треба ниту да се залетаме после Јуве“, вели тренерот Стефано Пиоли кој денеска одржа прес-конференција.
Милан го столчи Јуве во неделата среде Торино, го помина на табелата, но разликата од 3 бода на три кола до крајот воопшто не му дава мир на Пиоли.
„Фокусирани сме, овој натпревар е премногу важен, сѐ уште имаме потреба од освојување бодови. Јасно е дека победивме против историски ривал, имаме верба и свесни сме, но јасно ни е дека уште ништо не сме постигнале“.
„Ќе можеме да славиме тек тогаш кога ќе обезбедиме место во Лигата на шампионите. Сега треба да го задржиме ставот. Не се плашам од еуфорија, но загрижен сум бидејќи детали секогаш можат да одлучат натпревар, а ние имаме некои проблеми“.
Торино со добри резултатите во последниов период излезе од опасната зона, но сѐ уште стравува за опстанокот бидејќи само 4 бода го делат од последното место кое води во Серија Би.
„Утрешниот натпревар ќе биде различен од оној во неделата. Противникот негува сосема поинаков систем и однесување, така да ќе зависи од изборот што јас ќе го направам. Тимот е добро, опоравен, мораме да влеземе во натпреваров со истото внимание“.
Утрешниот ќе биде трет натпревар помеѓу овие два тима сезонава бидејќи се сретнаа и во Копа Италија. Тогаш во осминафиналето одиграа 0:0, а Милан победи на пенали, додека на првиот лигашки натпревар „Росонерите“ победија со 2:0.