Златан Ибрахимовиќ ги остави своите соиграчи на цедило синоќа откако по втор пат пожолте и мораше предвреме да замине во соблекувалната.
Кавгата и навредите на Ибра со Ромелу Лукаку придонесоа само со жолти картони за двајцата, но потоа Швеѓанецот заработи уште еден, што значеше исклучување. Во 58. минута Ибра сакаше да го запре продорот на Александар Коларов, кој не ни претставуваше опасност бидејќи беше на средината на теренот, но го сопна од зад грб, старт за кој по правило се доделува жолт картон.
Судијата Паоло Валери ги следеше правилата, а ни самиот Златан не се бунеше бидејќи му беше јасно дека направи наивен и сосема непотребен фаул кој му донесе црвен картон.
„Првиот жолт картон директно влијаеше на исклучувањето. Не знам што си кажале, но се случува. Вториот жолт беше поради неговата желба да брка наназад и да му помогне на тимот. Можеше да успори, но ете, се случува“, рече тренерот Стефано Пиоли говорејќи за Rai Sport.
Потоа додаде и дека Ибра им се извинил на соиграчите во соблекувалната по натпреварот. Факт е дека тој е директен виновник за елиминацијата од Копа Италија бидејќи додека беше на терен Милан водеше токму со неговиот гол постигнат во 31. минута, а потоа Интер со играчка предност направи предност и победи со 2:1.
„Во соблекувалната Златан им се извини на сите. Тој е голем шампион“, додаде Пиоли.