Шестгодишната истрага на холандските власти за предавството на младата Ана Франк го идентификува осомничениот за смртта на една од најпознатите еврејски жртви на холокаустот, пренесе Reuters.
Нејзиното засолниште го открил еврејскиот нотар Арнолд ван дер Берг, според тврдењата на тимот составен од пензионираниот ФБИ агент Винсент Панкок и 20 историчари, криминолози и експерти за анализа на податоци.
По повеќе од 75 години откако нацистите упаднале во засолништето на Франк во Амстердам, истражувачите заклучија дека е многу веројатно Ван дер Берг да го предал семејството за да го спаси сопственото семејство.
Како што е соопштено, обидот за идентификација на предавникот нема за цел да доведе до кривично гонење, туку да ја реши една од најголемите неразјаснети мистерии во Холандија, во текот на Втората светска војна.
Користејќи техники за анализа на голема количина податоци, составена е главна база податоци од листите на нацистички соработници, шпиони, историски документи, полициски евиденции и претходни истражувања, со цел да се добијат нови траги.
Десетина сценарија и локации на осомничени се визуализирани на мапа за да се идентификува предавникот на основа на сознанија на местото на криење и мотивот.
Нацистите ја пронашле Ана на 4 август 1944 година, по две години криење. Нејзиниот дневник бил чуван на безбедно место. Таткото на Ана, Ото Франк, го објавил во 1947 година две години откако Ана починала во логорот Берген Белсен, на 15-годишна возраст.
Нејзиниот дневник е преведен на 60 јазици и прочитан од повеќе милиони луѓе низ светот.