Мајкл Џеј Фокс, најпознат по улогата во филмовите „Враќање во иднината“ (Back to the Future), отворено зборуваше за најлошите денови од неговиот живот и рече дека се повлекува од актерската кариера од здравствени причини.
На Фокс му беше дијагностицирана Паркинсонова болест кога имаше само 29 години. Иако долго време се бореше со оваа состојба, пред две години доби уште една тажна вест - лекарите му најдоа тумор на 'рбетот што забрзано растеше. Имаше страшни болки, па речиси остана неподвижен.
Своите размислувања на оваа тема ги сподели во својата нова книга „Нема време како иднината“ (No Time Like the Future).
„Има време за сè, а моето работно време од 12 часа и запамтувањето на седум страници дијалог се зад мене, барем засега. Да бидам фер со себе и со продуцентите, режисерите, уредниците, сценаристите и актерите, ќе кажам дека влегувам во втора пензија. Тоа би можело да се смени, бидејќи сè се менува“, напиша Фокс.
Фокс наскоро ќе наполни 60 години, па затоа е целосно насочен кон семејството. Тој ужива во бракот со неговата сопруга Трејси Полан, со која е заедно од 80-тите години, и е фокусиран на своите деца - синот Сем, близнаците Аквина и Шујлер, како и најмладата ќерка Есме.