Минатиот септември, поради топењето на глечер, беше предизвикано големо лизгање на земјиштето, што резултираше со мегацунами високо 198 метри на Гренланд.
Потоа следеше она што досега беше необјасниво за научниците, а тоа е деветдневна мистериозна вибрација на планетата Земја. Научниците сега имаат одговор на прашањето што всушност се случило, а тој одговор е објавен во научното списание Science.
Имено, студијата покажа дека Арктикот влегува во неизвесен период, што е последица на зголемувањето на глобалната температура поради активностите на човекот.
Коавтор на студијата и сеизмолог на Универзитетскиот колеџ „Лондон“, Стивен Хикс, забележа дека некои сеизмолози мислеле дека нивните инструменти се скршени кога почнале да регистрираат вибрации низ тлото. Сигналите за земјотреси обично траат неколку минути, а во тоа време сигналите траеле 9 дена.
Сеизмолозите ги следеле сигналите до Источен Гренланд, но не можеле да утврдат одредена локација. Според тоа, контактирале со колегите во Данска, кои добиле извештај за цунами предизвикано од лизгање на земјиштето во регионот на фјордот Диксон.
После тоа, започнала едногодишна соработка на 68 научници од 15 земји, кои поминале низ сеизмички, сателитски и теренски податоци. Покрај тоа, создале симулација на цунами за да ја решат загатката.
Кристиан Свеневиг од Универзитетот во Копенхаген она што се случи го нарече „каскадна опасност“ предизвикана од климатските промени. Со години глечерот се топел во подножјето на огромна планина која се издига на речиси 1.200 метри над фјордот Диксон.
Како што се топел глечерот, планината станувала сè понестабилна, а потоа се урнала на 16 септември минатата година. Ова резултирало со формирање на камења и остатоци во водата, чие количество било доволно за да се наполнат 10.000 олимписки базени. Конечната последица била мегацунами, едно од највисоките цунамија во поновата историја, т.е. бран кој се движел напред-назад на секои 90 секунди 7 дена во тесен фјорд.
Всушност, тоа е феномен на сеш, кој подразбира ритмичко движење на бран во затворен простор, слично на движењето на водата во када. Иако сешите се добро познати, научниците претходно не знаеле дека тие можат да траат толку долго.
„Да речев пред една година дека сешот може да трае 9 дена, луѓето ќе одмавнеа со главите и ќе речеа дека тоа е невозможно“, рече Свеневиг, кој го спореди откритието со ненадејното откривање на нова боја во виножитото.
Научниците утврдиле дека овој сеш создавал сеизмичка енергија во Земјината кора. Никој не беше повреден во цунамито, но уништи објекти од културно наследство стари со векови и оштети празна воена база. Со оглед на тоа што цунамито беше на вообичаената рута на бродовите за крстарење, последиците ќе беа поразителни доколку некој се погодеше таму во тој момент.
Свеневиг истакна дека Гренланд никогаш не доживеал таков одрон и вакво цунами, објави CNN.
