Шведскиот актер Долф Лундгрен, познат по улогите во акционите филмови, им се обрати на своите обожаватели преку Instagram, откривајќи дека неговата долга битка со ракот конечно е завршена.
Во емотивна објава, Лундгрен ја сподели веста дека неговата битка со болеста е при крај и дека се подготвува за последниот чекор од неговото лекување, кое вклучува аблација на белите дробови.
„Конечно без рак со благодарност и возбуда за светла иднина. Ви благодарам за сета ваша поддршка секогаш“, напиша актерот.
Лундгрен ја откри својата дијагноза за рак во мај годинава. Првиот тумор бил пронајден пред 8 години во неговиот бубрег и успешно бил отстранет. Сепак, во 2020 година, ракот се прошири на неговите бели дробови, 'рбетот, црниот дроб и желудникот, а лекарите му дадоа многу лоша прогноза, велејќи дека има само две до три години живот.
Сепак, и покрај ужасните прогнози, Лундгрен продолжи да се бори и сега со гордост објави дека е на крајот од својот здравствен предизвик.
Актерот, кој е роден во Стокхолм, моментално е во брак со 28-годишната Ема Крокдал. Познат е по улогите во култните акциони филмови, особено оние во серијалот „Rocky“, каде светската слава ја стекна во 1985 година со улогата на рускиот боксер Иван Драго. Потоа продолжи со испешните улоги. Следуваше играњето на суперхеројот Хи-мен во „Masters of the Universe“ (1987), а потоа се истакна како негативец во „Universal Soldier“ (1992) против Жан-Клод Ван Дам и во „Johnny Mnemonic“ (1995) против Киану Ривс.
Подоцна, постигна значителен успех во други акциони филмови, а на големото платно се врати во 2010 година, кога стана дел од актерската екипа на „The Expendables“, заедно со Силвестер Сталоне, Џејсон Статам, Мики Рурк и Џет Ли.
