Македонската тениска надеж Калин Ивановски не успеа да се пласира во полуфиналето на јуниорскиот Вимблдон откако попладнево по голема борба загуби од шпанскиот тенисер Педро Роденас со 2:1.
Првиот сет му припадна на младиот македонски тенисер со 6:3 за 25 минути игра, но вториот беше вистинска драма. Шпанецот силно нападна и цело време водеше, едно време дојде и до високи 1:5. Потоа Калин успеа да се врати во игра и да израмни на 5:5 за да се замине на тајбрејк. По речиси едночассовна битка (57 минути) Роденас успеа да победи и за израмни на 1:1 во сетови. Се чини токму овој загубен сет беше клучен за она што се случи потоа.
Неизвесно беше и во третиот, решавачки сет. Калин поведе со 1:0, а потоа Роденас направи пресврт и водеше со 1:3. Младиот Македонец израмни на 3:3 за потоа Шпанецот да поведе со 3:5. Калин го доби наредниот сет, но потоа не успеа да израмни и да се избори за тајбрејк бидејќи Шпанецот победи со 6:4.
Роденас во полуфиналето ќе игра против 17-годишниот Хрват Мили Пољичак кој е рангиран на 553. место.
Иако беше запрен во четвртфиналето, Ивановски покажа одлични игри на овогодинешниот Вимблдон за јуниори остварувајќи три победи пред да го претрпи единствениот пораз. Овој пат стигна еден чекор понатаму бидејќи лани беше елиминиран во осминафиналето.
На патот до четвртфиналето ги елиминираше Лука Поу (Обединето Кралство), Родриго Пачеко Мендес (Мексико) и Едас Бутвилас (Литванија).