Христо, светски познатиот современ уметник со бугарско потекло, кој поголемиот дел од животот работеше во САД, почина на 84 години во неговиот дом во Њујорк.
Христо Јавашев, кој секогаш работеше со неговата сопруга Жан-Клод, е познат по неговите масивни дела во кои покриваше знаменитости со платно или најлон.
Христо избегал од комунистичка Бугарија во 1957 година, прво во Прага, а потоа во Виена и Женева. Една година подоцна се преселил во Париз, каде што ја запознал неговата сопруга и уметнички партнер Жан-Клод Денат де Гилебон (почина во 2009, на 74 години). Живеел во Њујорк 56 години.
Неговите дела, меѓу кои завиткувањето на Рајхстагот во Берлин и мостот Пон-Неф во Париз, „ги зближуваа луѓето“, стои во соопштението објавено на официјалната Facebook страница на уметникот.
„Христо го живееше животот со полни гради и не само што го сонуваше она што се чинеше невозможно, туку исто така и го остваруваше“, се вели понатаму во пораката до неговите обожаватели и се додава дека уметничките дела на двојката „продолжуваат да живеат во нашите срца и сеќавања“.
Во неговиот последен проект тој сакаше да ја обвитка Триумфалната порта во Париз со 25.000 квадратни метри полипропиленска ткаенина која може да се рециклира во сребреносина боја и 7.000 метри црвено јаже.