Мишко Ражнатовиќ, менаџерот на српскиот кошаркар Никола Јокиќ, раскажува како од просечен играч направил НБА ѕвезда и дека не можел ни да замисли дека толку брзо ќе направи ваква кариера.
Во разговор за Index.hr менаџерот истакнува дека Јокиќ (25)порано не изгледал баш како на фотографиите што деновиве се вирални на социјалните мрежи, а на кои е прикажан како полничко момче за кое не би се претпоставило дека ќе стане еден од најдобрите кошаркари во светот.
„Не беше баш како на оние фотографии, но имаше вишок килограми и беше значително физички послаб од сите други во екипата. Кондициониот тренер веднаш го извлече од тимскиот тренинг и му рече да го доведе телото во состојба да може да тренира со остатокот од екипата. Му рече дека ќе се повреди во рок од три дена ако веднаш почне со целосен тренинг. Но, Јокиќ покажа дека физикалиите не се пресудни и за тоа ми е многу мило бидејќи им отвора врата на сите деца да сонуваат дека можат да станат Ол Стар играчи, дека не е важно дали имаат планина од мускули и дали можат да скокаат којзнае колку високо. Тој е исклучително атипичен пример, но добар за сите деца кои играат кошарка, особено во овој наш чуден регион“, вели Ражнатовиќ.
„Претходно за него беше нормално за еден оброк да изеде пола кило бурек и да испие два литра ‘кока кола’. Тоа сепак не е најсмешната анегдота за него. Подобра е онаа кога потпиша толку многу автограми што доби воспаление на тетивата на раката и мораше да прошушти еден ден тренинзи и неколку натпревари“, раскажува менаџерот за Index.hr.
Тој нагласува дека со тек на време неговите прехранбени навики се смениле.
