Полицијата во Бејрут денеска употреби солзавец за да ги растера демонстрантите во главниот град на Либан.
Демонстрантите се обидоа да се пробијат низ ограда за да стигнат до зградата на Парламентот во Бејрут за време на протестите разгорени од незадоволството на граѓаните од начинот на кој власта изреагира на смртноносната експлозија што го потресе градот во вторникот.
Околу 5.000 луѓе се собраа на плоштадот во центарот на градот, од кои некои наводно фрлале со камења.
Демонстрантите извикуваа: „Луѓето сакаат режимот да падне“.
Бројот на загинати во експлозијата во центарот на Бејрут што се случи во вторникот денеска се искачи на 158, а повредени се повеќе од 6.000 лица, соопшти либанското Министерство за здравство.
Како што се наведува, 21 лице се водат како исчезнати.
Експлозијата во пристаништето во Бејрут ја предизвика палењето на повеќе од 2.700 тони амониум нитрат, кој бил складиран шест години, откако бил конфискуван од царинската служба.