Неверојатно вкусни полнети пиперки во турски стил. Во филот влегува само ориз, а за прекрасна кора печете ги во рерна.
Македонските полнети пиперки се полнат со мелено месо и ориз, но пробајте го овој турски рецепт каде се полнат со ориз. Два вида доматна паста ги прават пикантни, па се одлични за оние кои не јадат месо, но и ако сакате малку полесен оброк, а да заситува. Добро испечете ги во рерна, бидејќи така кората ќе биде поубава, а самите пиперки повкусни.
Потребни состојки:
- 1 кг зелени пиперки
- 55 мл маслиново масло
- 2 кромида
- 1 лажица доматна паста
- 1 лажица пикантна доматна паста
- 1 лажичка слатка пиперка
- ½ лажичка сув босилок
- 250 гр ориз
- 2-3 чешниња лук
- 2 домата
- 200 мл топла вода
- малку магдонос
За сосот:
- 1 лажичка доматна паста
- 1 лажичка чили паста
- 300 мл топла вода
- 4 супени лажици маслиново масло
Подготовка:
На маслиново масло пропржете го ситно сечканиот кромид додека да омекне. Потоа додадете ги и двете доматни пасти и измешајте. Посипете со слатка пиперка и магдонос, а потоа измешајте и оставете да врие неколку минути. Додадете го измиениот и процеден ориз и убаво измешајте, па додадете го ситно сечканиот лук. Додадете сечкани домати, промешајте, и по 5 минути прелијте со вода. Покријте и варете додека не испари водата. На крајот додадете свеж сечкан магдонос. Исклучете го шпоретот и оставете го филот да отстои околу 10 минути. Пиперките исчистете ги, па со чепкалка прободете ги на неколку места. Се филува со филот, па се редат пиперките во тава. Покријте ја секоја пиперка со домат. Во еден сад измешајте ги доматните пасти, водата и маслиновото масло, па измешајте и прелијте ги со пиперките. Се пече во загреана рерна на 200°C околу 50 минути.
