Полскиот премиер Матеуш Моравјецки објави дека членовите на националниот олимписки тим, кои ќе настапат на Игрите во Токио, како и фудбалската репрезентација која ќе учествува на Европското првенство ќе бидат вакцинирани против вирусот COVID-19.
„Со цел да им обезбедиме удобност на нашите спортисти за кои се надеваме дека ќе ни донесат задоволство во Токио, одлучивме да ја вакцинираме целата делегација, како и фудбалската репрезентација, која ќе настапи на Европското првенство“, изјави претседателот на полската Влада.
Министерот за култура Пјотр Глињски рече дека вкупно ќе бидат вакцинирани 1.077 олимпијци и придружниот персонал, како и 60 членови на фудбалската репрезентација од кои 23 ќе бидат фудбалери, но УЕФА дополнително ќе одлучи дали да дозволи проширување на списокот за уште два-тројца играчи. Инаку, Полска на Олимпијадата ќе ја претставуваат 141 натпреварувач во 16 различни спортови.
Досега во Полска, која има популација од 38 милиони жители, вакцина против коронавирусот примиле 2,1 милиони луѓе.