Овој посен ролат со спанаќ е совршен избор за посните прослави, а и брзо се подготвува.
Рецептот е на српската фудблогерка Лариса Стајиќ, објавен на Instagram.
Потребни состојки:
за кората:
- 150 гр брашно
- ½ лажичка сол
- 1 лажичка прашок за печиво
- 200 гр варен сечкан спанаќ
- 200 мл кисела вода
- 2 лажици масло
за филот:
- 200 гр туна
- 100 гр посен мајонез
Подготовка:
Сварете го спанаќот и оставете го да се излади. Вклучете ја рерната да се загрее на 200°C. Истурете го брашното во поголем сад, додадете сол и прашок за пециво, па измешајте. Додадете спанаќ, кисела вода и масло. Добро измешајте ја смесата и истурете ја во поголем плех обложен со хартија за печење.
Распоредете ја смесата рамномерно и печете 10-15 минути. Кората е тенка, па брзо ќе биде готова. Испечената кора ролајте ја заедно со хартијата и завиткајте ја во влажна крпа. Оставете да се излади, а во меѓувреме подгответе го филот. Исцедете ја туната од маслото, а потоа помешајте ја со посниот мајонез.
Одмотајте ја кората, нежно одвојте ја од хартијата и распоредете го филот, внимавајќи да не отиде до работ, за филот да не истече. Повторно ролајте ја кората со филот и ставете ја во фрижидер најмалку 3 часа, за убаво да се соединат состојките. Изладениот ролат исечете го на тркалца и послужете.
