Хрватски нуркач го собори светскиот рекорд за најдолго време под вода без воздух.
Будимир Шобат, со надимак Буда, всушност го собори сопствениот рекорд кој досега беше во Гинисовата книга на рекорди за најдолго време поминато под вода без воздух.
Буда, новиот рекорд го постави со неверојатни 24 минути и 33 секунди без да земе воздух. Тоа се точно 22 секунди подолго од претходниот рекорд кој Буда го постави во февруари 2018 година.
Новиот рекорд е поставен во базен во градот Сисак, околу 57 километри југоисточно од Загреб, односно градот кој лани беше погоден од разорен земјотрес.
Поради големата опасност која демне при ваков несекојдневен зафат, обидот на Буда бил константно под надзор на лекарски тим.
Популарниот Буда има 54 години и е поранешен бодибилдер. Тој со години наназад тренирал под посебен режим кој му овозможува на неговото тело бавно ослободување на кислород, нешто што е клучно за задржување на здивот подолг период.
