Светската заедница мора да преземе итна акција во борбата против глобалниот недостиг на вода за пиење, предупреди вчера генералниот секретар на Обединетите нации Антонио Гутереш на крајот од конференцијата за вода на ОН.
„Сите надежи на човештвото за иднината на некој начин зависат од трасирање на нова насока, заснована на науката“, рече Гутереш на последниот ден од тридневната конференција во Њујорк.
„Тие зависат од спроведувањето на инклузивните и акционо ориентирани заложби што земјите-членки и другите ги презедоа на оваа конференција“, додаде шефот на ОН.
ОН во пресрет на конференцијата: Светот се соочува со глобална криза за вода
Во текот на изминатите два дена, земјите-членки, невладините организации и претставниците на бизнисот договорија различни необврзувачки мерки за борба против глобалниот недостиг на вода за пиење, на состанокот организиран од Холандија и Таџикистан.
Конференцијата на ОН за вода, која започна во средата, беше првиот голем настан на ОН кој целосно се фокусираше на политиката за вода од 1977 година. Во пресрет на конференцијата, ОН се огласија со аларм, предупредувајќи дека светот се соочува со „глобална криза за вода“ поради растот на населението, социо-економскиот развој и промените во моделите на потрошувачка.
На глобално ниво, 2 милијарди луѓе немаат доволно здрава вода за пиење, а 3,6 милијарди немаат пристап до безбедни санитарни објекти, се вели во извештајот на УНЕСКО објавен пред конференцијата. Глобалното урбано население кое се соочува со недостиг на вода се предвидува потенцијално да се удвои, од 930 милиони во 2016 година на меѓу 1,7 и 2,4 милијарди луѓе во 2050 година.
Употребата на водата во производството на храна и земјоделството како проблем
Изнесувајќи ги своите завршни зборови вчера, Гутереш ја истакна критичната важност од развивање на „нови, алтернативни системи за храна за да се намали неодржливата употреба на вода во производството на храна и земјоделството“. Глобалниот пристап кон водата треба да се интегрира со оние поврзани со екосистемите и климата за да се намалат емисиите на стакленички гасови, рече шефот на ОН.
Ова значи создавање отпорна инфраструктура, планови за снабдување со вода и третман на отпадни води, како и „обезбедување дека секој човек во светот е заштитен со системи за рано предупредување од природни катастрофи до 2027 година“, посочи генералниот секретар на ОН.
Климатските проблеми и економските тешкотии поврзани со загадувањето го отежнуваат снабдувањето со вода за пиење, се наведува во Светскиот извештај за води, кој беше објавен пред конференцијата. Се проценува дека десет проценти од светското население живее во земји со висок или критичен ризик од недостиг на вода.