Тазе оскаровецот и еден од најуспешните актери на денешницата, Роберт Дауни Џуниор, се враќа во филмската франшиза која му донесе светска слава.
Популарниот актер ќе го игра легендарниот негативец на Marvel Виктор фон Доум, попознат како Доктор Дум, кој ќе се појави во новиот филм од серијалот Avengers, со наслов Avengers: Doomsday.
Филмот ќе биде во режија на браќата Џо и Ентони Русо, кои исто така го означуваат нивното враќање во филмскиот универзум на Marvel (MCU). Браќата Русо ќе работат и на Avengers: Secret Wars.
Avengers: Doomsday ќе има премиера во мај 2026 година, а Secret Wars во мај 2027 година.
„Нова маска, иста задача. Што ви реков? Обожавам да играм комплексни ликови", рече Дауни Џуниор на сцената на популарната конвенција San Diego Comic Con, откако браќата Русо го најавија неговото враќање.
Веста за враќањето на Дауни ги одушеви и шокираше фановите кои мислеа дека тој ќе се врати во улогата на Ајрон Мен.
Дауни Џуниор го глумеше популарниот суперхерој во десет филмови на Marvel, а последниот филм во кој се појави беше Avengers: Endgame, во кој Ајрон Мен се жртвува за да го спаси светот од негативецот Танос.
„Ова е најголемиот кам-бек во историјата на современиот филм?!“, напиша еден корисник на Instagram.
„Леле, не очекував да ја слушнам оваа вест денес“, додаде друг.
„Одлично, ми недостигаше“, додаде трет.
И покрај позитивните реакции, некои фанови на Marvel се скептични за враќањето на Дауни и тврдат дека на Marvel му дошол крајот.
„Marvel пропаѓа толку лошо што треба да го вратат РДЏ“, напиша еден разочаран обожавател, додека друг додаде: „Дали Холивуд остана без актери?“
„Ова нема никаква смисла“, додаде трет.
