Огромните пожари кои беснеат на западниот бред од Северна Америка допринесоа дури три американски и еден канадски град да влезат во Топ 10 од најзагадените градови во светот.
Пожарите кои опустошија голем дел од сојузните држави Калифорнија, Орегон и Вашингтон го направија и воздухот загаден долж целиот западен брег на САД, а трага оставија и на север во Канада.
Сега на врвот на листата на најзагадени градови во светот, според мерењето за вчерашниот ден, се наоѓа Портланд со коефициент од 182.
Зад него е канадскиот Ванкувер со 169, додека Топ 3 кругот го затвора Сиетл со 153. Во црвената зона од над 150 се и Шангај и Кувајт Сити.
Во Топ 10 се проби и Лос Анџелес така што сега дури три американски градови се помеѓу најзагадените градови во светот.
Затоа, пак, нашиот Скопје, благодарение на пожарите излезе од Топ 10 и сега е „само“ 12-ти. Сепак, македонската престолнина сѐ уште е најзагаден балкански и европски град, само малку пред Сараево.