Денеска се одиграа четвртфиналните натпревари кои ги дадоа патниците во полуфиналето од Купот на Македонија.
Оваа сезона домашниот куп се игра во еден здив, односно без реванши заради набиениот распоред.
Интересно, од четирите натпревари два се играа во Струмица. Таму, на својот нов стадион Академија Пандев тесно во 2:1 го елиминираше скопски Шкупи уништувајќи му го сонот за пат до финалето. Пандевци поведоа во првиот дел преку Томовски, а во 63. минута гостите израмнија преку гамбискиот голгетер Дарбо. Сепак, само шест минути подоцна „Пандевци“ повторно дојдоа до водство преку Илиев, гол кој се покажа и како победнички.
Стадион „Пандев“ во Струмица
Академија - Пандев - Шкупи 2:1 (1:0)
Стрелци: 36' Горан Томовски, 69' Томислав Илиев - 63' Дембо Дарбо
Судија: Марјан Ецкоски (Охрид)
На вториот натпревар во Струмица се радуваше гостинската екипа. Македонија ЃП поведе шест минути пред полувремето, но Беласица веднаш возврати. Сепак, во вториот дел со три гола „Лавовите“ го решија патникот во полуфиналето.
Стадион „Благој Истатов“ во Струмица
Беласица - Македонија ЃП 1:4 (1:1)
Стрелци: 43' Антонио Каланоски - 39', 77' Ермедин Адем, 57' Андерсон Барбоза Сантус, 85' Абдул Халид Басит
Судија: Јован Качевски (Струга)
Мрежите на натпреварот помеѓу Силекс и Шкендија 90 минути мируваа, па полуфиналистот мораше да биде решен со изведување на пенали. Во пенал-рулетот посреќни беа кратовчани чиј голман Горан Трајковски успеа да одбрани два пенала, а неговите колеги четири пати го совладаа Беким Реџепи.
Стадион „Силекс“ во Кратово
Силекс - Шкендија 0:0 (4:2 пен.)
Судија: Марјан Ецкоски (Охрид)
Пеналите:
Денис Ристов (гол) - Еннур Тотре (одбранет)
Срѓан Драшковиќ (одбранет) - Валмир Нафиу (гол)
Кристијан Костовски (гол) - Бесарт Ибраими (одбранет)
Виктор Серафимовски (гол) - Бруно Дита (гол)
Даниел Карчески (гол)
Крај водите на Охридското Езеро со минимални 1:0 Струга го совлада тимот на Ренова. Победничкиот гол стружани го постигнаа од белата точка на почетокот од вториот дел.
Стадион „Градска плажа“ во Струга
Струга - Ренова 1:0 (0:0)
Стрелци: 54' (п) Нијас Лена
Судија: Марјан Гоцевски (Струмица)
Сега следува жрепката за полуфиналето, додека двата натпревара кои ќе ги дадат финалистите се закажани дури за 7 април наредната година.