Синоќа во арената PalaOlimpico во Торино се одржа првото полуфинале на Евровизија каде настапија 17 изведувачи, а десет од нив се пласираа во финалето кое ќе се одржи на 14 мај.
Десет земји стигнаа до финалето, а на 14 мај во Торино повторно ќе ги видиме Швајцарија, Ерменија, Исланд, Литванија, Португалија, Норвешка, Грција, Украина, Молдавија и Холандија.
Првата полуфинална вечер на овогодинешниот Евросонг во Торино ја отвори Албанија, а нивната претставничка Ронела Хајати ја изведе песната „Secret“ и доби громогласен аплауз. По Албанија, следуваа настапите на натпреварувачите кои се бореа за финалето кое ќе се одржи на 14 мај.
Само пет изведувачи синоќа пееја на мајчин јазик, а тоа се претставниците на Словенија, Украина, Летонија, Холандија и Исланд.
Најголемо внимание привлече настапот на Украина, а земјата разурната од војна ја претставува оркестарот Калуш со песната „Stefania“. За време на настапот во арената во Торино се слушаа извици на поддршка, а во публиката беа забележани и голем број украински знамиња. Според обложувалниците, Украинците имаа најголеми шанси за пласман во полуфиналето, дури 95 отсто.
На првата полуфинална вечер настапи и претставник на Хрватска. Миа Димишиќ ја изведе песната „Guilty Pleasure“ и за жал не обезбеди пласман во финалето на својата земја. Хрватска последен пат беше во финалето на Евровизија во 2017 година кога на ова престижно натпреварување беше претставена од Жак Ходек.
Во втората полуфинална вечер ќе настапат претставници од 18 земји, меѓу кои нашата претставничка Андреа и претставниците на Србија и Црна Гора.
Финалната вечер на Евровизија 2022 година ќе се одржи во сабота на 14 мај, а веќе се познати дел од финалистите.