Гасоводот Северен поток 2 во Балтичкото Море конечно престана да испушта гас, соопшти данската енергетска агенција Energistyrelsen.
Агенцијата на Twitter објави дека компанијата која управува со гасоводот Северен поток 2 ја информирала дека притисокот во гасоводот изгледа се стабилизирал.
„Ова покажува дека истекувањето на гас престанало. Или гасоводот е целосно празен или притисокот на гасот во цевководот и водата надвор се во рамнотежа“, објави агенцијата.
Портпаролот на Газпром, кој е под контрола на Кремљ, вчера изјави дека по експлозијата што погоди два гасоводи во Балтичкото Море, истекоа 800 милиони кубни метри природен гас.
Лидерите на ЕУ ќе разговараат за „саботажа“ на гасоводот Северен поток на претстојниот самит во Прага, изјави претседателот на Европскиот совет Шарл Мишел, нарекувајќи ги инцидентите „закана за ЕУ“.
„Ние сме решени да ја обезбедиме нашата критична инфраструктура“, напиша Мишел на Twitter.
Европските лидери од повеќе од 40 земји се поканети на собир во Прага во четврток, пред лидерите на 27-те земји-членки на Европската Унија да се состанат на самит во петок.
