Германскиот производител ја претстави новата генерација на популарното комбе.
Дизајнот на VW T7 Multivan се надоврзува на неговиот претходник Т6, кој се продава од 2015 година, а беше редизајниран на почетокот на 2019 година.
Новото комбе во моментов е достапно само во патничка варијанта, додека сите оние на кои им треба лесно комерцијално возило, сепак ќе можат да го нарачаат VW T6.
Volkswagen го постави T7 на добро познатата модуларна механичка платформа MQB, која групацијата VW ја користи за многу актуелни модели.
Овој трансфер му овозможи на популарното комбе за прв пат да добие plug-in хибридна верзија.
Модернизираниот надворешен дизајн е придружен со дигитализирана кабина со два големи екрани.
Во најбогатата и најлуксузно опремена верзија, како што е онаа на промо фотографиите, Т7 има три реда седишта, кои овозможуваат исклучителна удобност на патниците.
Во вториот ред има само две седишта, меѓу кои има централна конзола со масички на извлекување.
Дополнителните опции вклучуваат премиум аудио систем Harman Kardon со 640 вати и 14 звучници.
Најважната иновација во погонскиот систем е воведувањето на plug-in верзија наречена eHybrid.
Погонскиот систем се состои од 1,4-литарски TSI турбо-бензинец и електричен мотор од 85 kW, кои заедно произведуваат 218 КС (160 kW).
За складирање на електрична енергија се користи литиум-јонска батерија со капацитет од 13 kWh, а за пренос на снагата се користи 6-брзинскиот менувач DSG со двојна спојка.
Доколку не ве интересира електрификација, Volkswagen нуди и класични мотори.
На почетокот на продажбата ќе бидат достапни два бензинци со турбо полнење, послабиот 1,5-литарски со 136 КС (100 kW) и 2,0-литарскиот со 204 КС (150 kW). Турбо дизелот со 150 коњски сили ќе биде достапен следната година.
Датумот на почеток на продажбата и цената ќе бидат објавени подоцна.
Погледнете го Volkswagen T7 Multivan од секој агол во ОВАА ГАЛЕРИЈА.