Рокенрол бендот „Ласт експедишн“ кој опстојува на македонската музичка сцена од 80-тите, објави нова верзија со видеоспот за култниот хит „Шефе“.
Песната која спојува генерации рокери и алтернативци во Македонија доби видеоспот во кој бендот заедно со пријателите покажуваат како го доживуваат овој безвременски хит.
„Почитувачи на ликот и делото на ПОСЛЕДНАТА ЕКСПЕДИЦИЈА. Со особено задоволство Ви ја претставуваме новата верзија на култната песна Шефе за која се потрудивме да биде ГРАДСКА, НАРОДСКА, СВЕТСКА и не знам уште што али мислиме дека успеавме у све а патем речено 😄 да не ја оштетиме. Песната е Македонско-Американско- Канадска кооперација (копродукција) и сите ние што учествувавме во ова парче музика сме среќни и презадоволни“, напишаа од бендот на официјалната Facebook страница.
Клавијатури, микс и продукција се на Давор Јордановски, гитара – Кире Најдовски, бас – Бред Џонсон, тапани – Џо Лана Џуниор, а видео монтажа – Благоја Неделковски.
Во спотот учествуваа: Сецко, Енко, Диме, Влатко, Салпе, Драгче, Сашко, Ленин и Ноќни Волци, Ален, Ева, Бојан, Фриц, Панки, Филип, Симона, Кети, Дарко, Александар, Сашко, Драган, Славче, Гоце, Милан, Христина, Александар, Аце Флојд и колегите, Ристе Мерцедес, Зоран, Благој, Маја, Коста, Мики, Виктор, Фросина, Илија, Горазд, Дејан, Марија, Никола, Оливера, Пеце, Дејан, Бети, Филип, Мила, Влатко, Ангелина, Жарко, Горан, Анета, Кристијан, Бошко, Деко.
Претходно, во мај, бендот упати отворен повик „Сакаш да си дел од Последната Експедиција?“ во кој по примерот на големите светски бендови ги поканија фановите да се пријават за учество во снимањето на спотот со приклучување преку онлајн преку каналот Zoom.
Погледнете го видеоспотот и знаеме дека исто како нас ќе станете и ќе заиграте, каде и да сте.