Принцот Хари вчера беше гостин во подкаст-емисијата Armchair Expert каде зборуваше за првата средба со Меган Маркл, напуштањето на кралското семејство и одењето на психолог.
Британскиот принц опиша како изгледал неговиот прв таен состанок со Меган.
„Се сретнавме во еден супермаркет во Лондон и се преправавме дека не се познаваме. Застанавме на неколку метри и се допишувавме. Се сеќавам дека луѓето чудно ме гледаа и неколкумина дојдоа да ми кажат здраво. Носев капа и цело време гледав во подот за да ме видат што е можно помалку луѓе“, рече Хари со насмевка.
Тој додаде дека поради смртта на мајка му, принцезата Дајана, сакал да го напушти кралското семејство кога имал 20-тина години
„Тоа е работно место, нели? Стисни заби и заврши си ги должностите. Имав дваесет години и размислував - не го сакам ова. Не сакам да бидам тука. Не сакам да правам ова. Погледнете што оваа ‘работа’ ѝ направи на мајка ми. Како да се скрасам и да имам семејство кога знам дека нешто такво нешто може пак да се повтори?“, рече тој.
На крајот, Хари зборуваше за посетите на психолог, потенцирајќи дека Меган најмногу го поддржувала во одлуката да го стори тоа.
„Посетите на психолог го скршија стакленото ѕвоно во кое бев. Ја извадив главата од песок, ја истресив и помислив дека треба да сменам нешто за да бидам јас горд со себе си, нешто за кое мајка ми би се гордеела со мене, да направам важни промени“, рече тој.
За потсетување, принцот Хари неодамна соопшти дека наскоро ќе ја претстави емисијата за ментално здравје The Me You Can't See на која работи заедно со Опра Винфи.
