Напуштеното рибарско село Хоутоуван на кинескиот остров Шеншан, кое е дел од архипелагот Шенси, стана интернет сензација и необично место за патување.
Ова село изгледа како да е од бајка бидејќи буквално го проголтала природата. Хоутоуван, на кинески 后头湾 (или Hòutóuwān) порано било просперитетно рибарско село, во 80-тите имало околу 3.000 жители, но поради големата оддалеченост и тешкиот пристап во 90-тите жителите почнале да се иселуваат. Во 2002 година селото официјално станало ненаселено, а по неколку децении качувачките растенија ги прекриле куќите свртени кон океанот. Некои од нив сѐ уште се опремени со мебел.
Сепак, ова село стекна слава меѓу Кинезите во 2015 година откако на интернет се појавија фантастични фотографии. Наместо да се радуваат на новата популарност, претставниците на споменатиот архипелаг беа загрижени за влијанието на големиот број туристи.
„Телефонските линии ни беа преоптоварени, сѐ повеќе туристи сакаа да дојдат во Хоутоуван. Сепак, ова село нема услови да се отвори за туристи. Затоа ги молиме посетителите да го зачуваат неговиот мир“, стои во тогашното официјално соопштение на властите.
Меѓутоа, сега селото е подготвено за туризам. По две години планирање беше направен план за капитализирање на популарноста на зеленото село. Платформата за набљудување на селото е отворена во 2017 година, а билетот чини 3 долари. Посетителите можат да шетаат низ ридското село за 8 долари, а предупредувања за можни нови рушевини се поставени на напуштените куќи.
Популарноста на селото Хоутоуван значително го подобри туризмот на островот Шеншан, бидејќи многу туристи сега пристигнуваат да останат на островот, а не само во селото.
Минатата година селото го посетиле 90.000 туристи, што на островот му донело приход од 470.000 долари.
Архипелагот Шенси е малку повеќе од 60 километри оддалечен од Шангај, а островот Шеншан е познат по своите морски плодови и има една од најголемите рибни фарми во Кина.
