Има безброј козметички производи против темните кругови под очите, но како поевтина варијанта пробајте ги овие природни состојки.
Повеќето луѓе веќе знаат за компирот, краставицата и чајот од камилица како природни решенија за темните кругови и подуеноста под очите, но веројатно не сте слушнале за овие. Причината за овие појави најчесто се стресот, прекумерното внесување кофеин и недоволно здрав, ноќен сон.
Бадемовото масло е една од најважните состојки за нега на кожата на лицето, а тука спаѓа и областа околу очите. Со редовно користење на ова масло ќе ја осветлите кожата околу очите. Ставете неколку капки на врвовите на прстите и нежно натапкајте го маслото на кожата, навечер, на чиста кожа, а наутро исплакнете со ладна вода.
Блогерките за убавина го препорачуваат овој домашен рецепт за осветлување на кожата под очите: една лажица сок од зрел домат помешајте со една кафена лажичка сок од лимон. Наквасете две памукчиња во мешавината и ставете ги да постојат под очите 10 минути. Внимавајте течноста да не дојде во контакт со очите. Повторувајте ја постапката двапати дневно, сѐ додека не забележите промена. За максимални резултати, напијте се и чаша свеж сок од домат со малку свежо нане, сол и една лажица сок од лимон.
Јаболката содржат танин кој помага во осветлувањето на кожата. Витамините Б и Ц, како и калиумот, помагаат во хранење на чувствителната кожа околу очите. Исечете зрело јаболко на поголеми парчиња и ставете ги под очите да постојат половина час. Потоа исплакнете ја кожата со ладна вода и ставете хидратантна крема.
