Италијанскиот дефанзивец нема да може да игра на двете четвртфинални пресметки откако доби позитивен тест на COVID-19.
Пари Сен-Жермен ќе мора да се снаоѓа на десната латерала за тешкото гостување во Минхен кај актуелниот бранител на тронот, а потоа и за реваншот.
„При последното PCR тестирање за Sars-Cov2, Алесандро Флоренци излезе позитивен. Тој се наоѓа во изолација почитувајќи ги соодветните здравствени протоколи. За потсетување, играчот веќе од пред неколку дена е во изолација како мерка на претпазливост“, соопшти клубот.
Флоренци не играше во саботата против Лил токму поради сомневањата дека закачил корона.
Сега ќе мора да седи 10 дена во изолација, а потоа да добие негативен тест за да може да се врати на тренинг.
Баерн го пречекува ПСЖ во реприза на финалето од минатата сезона, а натпреварот се игра в среда од 21 часот на „Алианц Арена“ стадионот во Минхен.
Покрај овој натпревар, 30-годишниот Италијанец ќе го пропушти и дуелот со Стразбур од Лиг 1 викендов, како и реваншот со Баерн во вторник.
Флоренци сезонава настапува за ПСЖ како позајмен фудбалер од редовите на Рома каде треба да се врати во јуни доколку двата клуба не ги договорат условите за откуп.