Играчот на донечки Шахтар, Данило Сикан, синоќа против Селтик промаши буквално празен гол - дефинитивно едно од најголемите промашувања во историјата на Лигата на шампионите.
Во тек беше 72. минута кога при резултат 1:1 Шахтар молскавично одеше во контранапад. Михајло Мудрик фантастично се ослободи од своите чувари и незапирливо иташе кон шкотскиот гол.
Кога дојде до самиот гол, во зоната на удар, несебично додаде до својот соиграч Сикан, кој излезе буквално пред празен гол бидејќи Мудрик претходно го надитри и голманот на Селтик, познатиот Англичанец Џо Харт.
На неверување на сите присутни на „Селтик Парк“ стадионот во Глазгов, на Сикан не му беше доволна ваквата перфектна ситуација. Со левата нога се обиде да ја прими топката, но тоа го направи толку лошо и таа му се одби од ногата и почна да му бега. Сикан трчаше по топката која за негова несреќа се упати вон празниот гол на Селтик. Заврши крај стативата, а играчот во неверување само се фати за главата.
Да го постигнеше голот, Шахтар веројатно ќе победеше и ќе запишеше 3 бода со кои ќе останеше во игра дури и за првото место. Вака, заостанува три бода зад второпласираниот Лајпциг со кого и игра во последното решавачко коло, а ќе му биде потребна било каква победа за да се пласира во нокаут-фазата, додека на германскиот тим му одговара и реми.
Очекувано, утката на Сикан стана хит на интернет и со право веќе се смета за една од најголемите утки во историајта на ова натпреварување.