Amazon ги претстави своите нови машини, а една од нив е првиот целосно автономен робот наменет за магацини.
Станува збор за роботот наречен Proteus, кој е дизајниран така што може самостојно да се движи низ објектите на Amazon и да носи пакети. Компанијата соопшти дека роботот користи „напредна технологија за безбедност, перцепција и навигација“ и е развиен да извршува задачи без да ги вознемирува вработените.
На видеото објавено на YouTube се гледа како Proteus се движи под колички и ги транспортира до одредени локации. Роботот испушта зелен зрак пред себе додека се движи, кој функционира како сензор и запира доколку човек е пред зракот.
Целта на Amazon е да го автоматизира бизнисот со колички кои содржат пакети за да се намали потребата луѓето да ги преместуваат рачно низ магацините. Компанијата нагласи дека роботите се дизајнирани да создадат побезбедна работна средина за луѓето.
Уште еден нов робот е дизајниран со намера да го намали ризикот од човечка повреда. Тоа е роботската рака Cardinal која ги зема пакетите, ги „чита“ етикетите и потоа ги става во соодветната количка за следната фаза од процесот на испорака. Вештачката интелигенција и компјутерската „визија“ овозможуваат правилно сортирање на пакетите. Amazon моментално тестира прототип кој може да крева кутии тешки до 23 килограми, а овој робот ќе стапи во служба до следната година.
Amazon исто така развива технологија за вештачка интелигенција која може автоматски да скенира пакети. Во моментов, вработените треба да скенираат бар-кодови на пакетите користејќи рачни скенери, а новата технологија би ја елиминирала потребата за тоа. Благодарение на оваа технологија, луѓето нема да мора да се одмораат од сортирањето пакети. Системот брзо ќе го препознае пакетот користејќи ја својата камера. Оваа камера ќе има „компјутерска визија“ и технологија за машинско учење.
Amazon и претходните години користеше роботи, нагласувајќи дека тие ја подобруваат безбедноста во магацините и дека нивната цел не е да ги заменат луѓето.