BMW ќе ја прошири својата понуда на M performance модели, така што ќе го приклучи таму првиот M3 Touring во историјата на германскиот автомобилски гигант.
Првиот тест-прототип на моќниот караван M3 Touring наскоро ќе влезе во фазата „развој на пат“, а новиот модел се очекува во 2022 година.
M3 Touring ќе му овозможи на BMW конечно да има директен ривал на веќе добро познатиот адут на Audi - RS4 Avant.
Германската компанија го најави M3 Touring како „остварување на сонот“, автомобил кој на проширената M понуда ќе ѝ донесе „неспоредлива разноврсност на модели“.
Овој модел ќе си го најде местото до новата M3 лимузина и M4 Coupe, модели кои се очекува да бидат претставени во септември. Следната година ќе стигне M4 кабриолет.
Списанието Autocar уште во 2018 година објави дека во BMW сериозно размислуваат за модел M3 Touring, кој сега и официјално е потврден. Автомобилот наскоро се очекува да биде тестиран на улица, а потоа и на патеката Нирбургринг.
Техничките детали уште не се познати, освен податокот дека M3 Touring ќе има 6-цилиндарски M турбобензинец. Се очекува дека овој модел ќе дели многу карактеристики со новата M3 лимузина и со моделот M4, кои имаат S56 твин-турбо трилитарски мотор кој во стандардна конфигурација развива 473 коњски сили.
BMW никогаш досега немале M3 Touring во понудата, а во 2000 година имаше протоптип базиран на третата генерација на моделот. Многу новинари го повозија, но автомобилот не влезе во производство.