САД денеска ги бомбардираа позициите на проиранската милиција во североисточна Сирија, при што загинаа 17 лица во првата воена операција на администрацијата на Џо Бајден како одговор на неодамнешните напади врз западните интереси во Ирак.
Портпаролот на Министерството за одбрана на САД Џон Кирби ги потврди воздушните напади врз инфраструктурата лоцирана на граничниот премин што ја користи проиранската милиција Катаеб Хезболах.
Според првите информации на Сириската опсерваторија за човекови права, уништени се три камиони полни со муниција кои пристигнувале од Ирак на илегалниот граничен премин јужно од сирискиот град Букамала.
Проиранските групи извршија три напади во последните три дена
Додека претседателот Џо Бајден чека гест од Техеран пред повторно да воспостави договор што Вашингтон го повлече во 2018 година под Доналд Трамп, во последните денови проиранските вооружени групи извршија три напади.
Во понеделникот паднаа ракети во близина на американската амбасада во Багдад, а во саботата беше нападната ирачката воздухопловна база Балад.