Капсулата наменета за потпомогнато самоубиство доби одобрение во Швајцарија, а нејзиниот креатор смета дека следната година треба да биде подготвена за употреба во оваа земја.
Евтаназијата е легална во Швајцарија, а во 2020 година ја искористиле 1.300 луѓе, покажуваат податоците на двете главни организации за „потпомогнато самоубиство“. Животите на луѓето завршуваат со голтање течен натриум пентобарбитал, кој ги става во длабока кома пред да умрат. Сепак, д-р Филип Ничке ја разви капсулата Sarco произведена од 3D печатач, која нуди поинаков пристап. На клиентите им се гарантира брза и мирна смрт без никакви хемикалии.
Капсулата ја реализира својата цел така што се полни со азот, кој брзо ја намалува концентрацијата на кислород, а личноста во неа умира од хипоксија и хипокапнија. Дејството на капсулата предизвикува чувство на дезориентација, а лицето може да почувствува блага еуфорија пред да ја изгуби свеста. Д-р Ничке тврди дека смртта настапува по 30 секунди и дека нема ниту паника, ниту чувство на задушување.
Исто така, капсулата се активира одвнатре, така што лицето може самостојно да притисне копче кога е подготвено да го стори тоа. Капсулата е пренослива и може да се транспортира на која било локација.
Законскиот преглед на капсулата е завршен и може да се користи без проблем.
Третиот прототип на капсулата Sarco во моментов се прави со помош на 3D печатач во Холандија и треба да биде оперативен во Швајцарија во 2022 година.
Д-р Ничке минатата година изјави дека сака оваа технологија да биде достапна бесплатно, па програмата за печатење на капсулата ќе биде достапна на интернет.