Штом ќе почнете да чувствувате болки во грбот, првото нешто на што веројатно размислувате е дека сте истегнале мускул или сте го повредиле грбот. Сепак, лекарите предупредуваат дека во некои случаи грбот нема никаква врска со тоа, туку непријатните болки се предизвикани од проблеми со бубрезите.
Имајќи предвид дека бубрезите се наоѓаат во пределот на долниот дел на грбот, повеќето пациенти погрешно ја мешаат бубрежната болка со болки во грбот, но овие два типа на болка имаат различни причини и методи на лекување. Додека болките во грбот најчесто се предизвикани од некој надворешен феномен и може лесно да се отстранат, кога станува збор за бубрежна болка, состојбата обично е многу посериозна.
Лекарите објаснуваат дека болката во бубрезите најчесто е предизвикана од воспаление или некои посериозни болести кои ги зафаќаат бубрезите. Болката во грбот, од друга страна, обично е предизвикана од оштетување на ткивото во грбот. Ако научите да правите разлика меѓу нив, тоа може да ја олесни навремената дијагноза и понатамошниот третман.
Како да препознаете бубрежна болка?
Болките во бубрезите се длабоки, прободувачки, се појавуваат ненадејно и обично исчезнуваат и повторно се појавуваат. Болките најчесто се јавуваат во повисоките нивоа на 'рбетот и во пределот под ребрата, до 'рбетот, а докторите предупредуваат дека болките може да се почувствуваат и во централниот дел на стомакот или препоните. Сепак, болката во бубрезите обично вклучува и други симптоми, вели д-р Рена Д. Малик.
Овие симптоми се висока температура, повраќање и гадење, болно мокрење, заматена или темна урина и чести инфекции на уринарниот тракт. За разлика од болката во грбот, која во повеќето случаи поминува сама по себе, болката во бубрезите генерално нема да се подобри додека не ја идентификувате и лекувате основната причина.
Можни причини
Вашите бубрези го филтрираат отпадот од вашето тело, создаваат урина и произведуваат хормони кои го регулираат производството на црвени крвни зрнца. Болката во бубрезите обично е предизвикана од болести на бубрезите и други делови на уринарниот систем, а некои од овие причини вклучуваат камења во бубрезите, уринарна ретенција, везикоуретерален рефлукс, оштетување на бубрезите и полицистични бубрези. Секоја од овие состојби бара третман, инаку може да се појават посериозни последици како бубрежна инсуфициенција.
