Harley-Davidson денеска ни носи многу важни вести за нивната иднина: легендарниот производител на мотоцикли веќе почна да прима нарачки за купување на нивниот прв електричен модел, наречен LiveWire.
Новиот LiveWire веќе почна да се продава, а испорачката на мотоциклите ќе започне наесен. Неговата цена ќе биде 29.799 долари, што воопшто не е евтино, но сепак е разбирливо со оглед на тоа дека се работи за модел на компанијата Harley-Davidson.
Цената е значително поголема од оние на било кој друг електричен мотоцикл на пазарот. Zero, компанијата која е наречена „Tesla за мотоцикли“, го продава моделот Zero S почнувајќи од 10.995 долари, а нешто помоќниот модел Zero SR чини 16.495 долари. Секако, тие нема да ви го понудат 116-годишното искуство кое го има Harley Davidson, но ќе ви заштедат повеќе од десет илјади долари.
Harley исто така објави дел од спецификациите на новиот LiveWire. Тој забрзува од 0 до 100 км/ч за помалку од 3,5 секунди, а нема потреба од квачило и менување брзини, што го прави уште полесен за управување. Од компанијата велат дека овој модел ќе може да помине преку 160 километри во град со едно полнење, но истакнаа дека истото не важи за возење на автопат.
Само поради тоа што е електричен, не значи дека LiveWire е нешто побавен од останатите модели. Инженерите кои работеа на него тврдат дека тој е подеднакво моќен, па дури и го произведува истиот звук, како сите останати нови модели на Harley-Davidson.
