Првите луѓе на најголемите технолошки компании Facebook, Apple, Аmazon и Google денеска ќе присуствуваат на сослушување пред американските конгресмени, кои ќе се обидат да ја утврдат нивната пазарна моќ.
Четворицата водечки менаџери на овие гиганти ќе одговорат на прашањата на конгресмените преку видео-врска за нивниот бизнис, монопол и нелојална конкуренција.
Така, основачот на Facebook, Марк Закерберг, ќе мора да се правда поради фактот дека со преземањето на Instagram и WhatsApp, неговиот Facebook стана предоминантен во областа на социјалните мрежи.
Шефот на Apple, Тим Кук, ќе мора да разјасни зошто Apple мора да добива од 15 до 30 отсто од секоја продажба на нови апликации за мобилните телефони iPhone, главниот оперативен директор на Google, Сундар Пичаи, да го објасни монополот на неговата компанија во областа на интернет-пребарувањата, а сопственикот на Аmazon, Џеф Безос ќе говори за подрачјето на интернет продажбата.