Секоја година, компаниите трошат милиони долари за реклами од 30 секунди што се емитуваат за време на доделувањата на Оскарите или Златните глобуси, кога голем дел од светот е залепен за екраните.
Но, ABC, која ги има ексклузивните права за пренос на Оскарите, лани ја одби рекламата на Frida Mom во која имаше мајка како оди во веце по породување, со видни болки.
Годинава, брендот за производи за интимна нега и хигиена се враќа со нова реклама „без пардон“ што ќе се емитува за време на доделувањето на Златните глобуси.
Frida Mom овојпат отиде чекор понатаму и за првпат ќе прикаже како навистина изгледаат градите на жените кога дојат.
Видеото „Stream of Lactation“ е вистински приказ на тешкотиите со кои се соочуваат доилките, особено ако се нови мајки.
„Доста беше. Време е да се грижиш за твоите гради, а не само за бебето – со Frida Mom“, гласи слоганот што звучи како вистинско освежување во општество во кое мајчинството најчесто е прикажано како нешто „стерилно“ и „непотребно нашминкано“.