Кина официјално стана трета земја во светот која успешно собрала примероци од површината на Месечината, откако нејзиниот лунарен лендер Chang’e-5 успешно се врати на Земјата.
Денеска, во раните утрински часови по локално време, беспилотното летало слета на нашата планета носејќи примероци од природниот сателит на Земјата, објави кинеската државна новинска агенција Xinhua.
Примероците се земени од области на Месечината кои досега не биле посетени. Мисијата ги обезбеди првите месечеви материјали по 44 години – последната „пратка“ стигна во 1976 година кога со советската мисија Луна 24 беа собрани околу 170 грама камења од Месечината и успешно се донесени назад на Земјата.
Вселенската капсула слета во Сизиванг Банер, северно од кинескиот автономен регион Внатрешна Монголија, носејќи околу два килограми примероци, откако беше лансирана на 24 ноември.
За потсетување, сондата што го носи името на кинеската божица на Месечината, слета на природниот сателит на Земјата на 1 декември на рамнината позната како Oceanus Procellarum.
Според НАСА, ова големо и темно место на Месечината можеби е трага од џиновски космички удар кој предизвикал древно море од магма. Затоа, примероците од оваа област ќе им помогнат на научниците да истражат повеќе за потеклото и составот на Месечината, но и за историјата на нашиот Сончев Систем.
На снимката што ја објавија кинеските државни медиуми, се гледа како сондата Chang’e-5 безбедно слетува, а екипата за дочек слави во кадар со кинеското знаме. Напорите на Кина за истражување на вселената ја разгореа националната гордост и се приоритет на кинескиот лидер Си Ѓинпинг, кој често сборува за неговиот „вселенски сон“ како дел од пообемната визија Кина да стане сеопфатна светска суперсила.
Мисијата на Chang’e-5 е најновиот успех на кинеската вселенска програма која брзо напредува, а со тоа ги надразни натпреварувачките инстинкти на Вашингтон. Ако продолжи со вакво темпо, Кина за две децении ќе го постигне истото ниво на напредок за кое на САД им требаа 40 години.
Буџетот на Кина за вселенски истражувања не е јавно достапен, но непрофитната Space Foundation проценува дека е вториот најголем во светот и дека изнесува над 8 милијарди долари годишно, во споредба со оној на американската НАСА – 22 милијарди долари.
Лани Кина стана првата земја која слета ровер на „темната страна“ на Месечината – технички предизвик за кој беше потребен посебен лунарен сателит кој праќаше сигнали назад на Земјата. Во јули годинава Кина ја почна својата прва мисија за истражување на Марс и се надева дека до мај, 2021 година ќе има свој ровер на површината на „Црвената планета“.