Не се само фудбалерите заменливи, туку и музичарите. Таков трансфер направи францускиот гигант менувајќи ја нумерата која 29 години ги пречекуваше навивачите и играчите.
Летово ПСЖ направи еден куп промени, позитивни промени, менувајќи фудбалери и тоа носејќи ѕвезда до ѕвезда, предводени од Лео Меси и Серхио Рамос. Но, клубот реши реконструкцијата да не запре само во фудбалскиот дел, туку и во забавниот.
Во 1992 година ПСЖ почна како воведна музика пред почетокот на секој натпревар да ја пушта песната „Who Said I Would“ на англискиот музичар Фил Колинс, песна која стана препознатлива за „Парк де Пренс“. Навивачите се приврзаа за оваа нумера, ја засакаа... а како не би кога ја слушаат цели 29 години?
Само еден краток период клубот направи промена и тоа во 2015 после терористичкиот напад во градот. Тогаш воведната песна беше „O City of Light“ од Грегори Алан Исаков.
Кога ПСЖ го пречека Стразбур во 2. коло од Лиг 1 на 14 август, публиката остана зачудена кога од звучните наместо нивната омилена „Who Said I Would“ почна да ечи друга песна.
Новиот избор на клубот е нумерата „DJ Snake intro mixed“ на Диџеј Снејк која отсега ги дрма трибините на „Парк де Пренс“.
„Не се работи за грешка. Ние сме многу приврзани за таа песна (на Колинс, заб. на прев.), јас си ја слушам, и нашата намера не е целосно да ја исфрлиме од сите наши натпревари. Зошто да не би можеле да ја пуштаме 'Go West' или песната на Фил Колинс кога играчите ќе излезат на загревање? Добив доста позитивен фидбек од луѓе кои уживаа во песната“, вели клупскиот директор за диверзификација, Фабјан Алегре, за Le Parisien.
ПСЖ одлучи да поддржи локален уметник. Диџеј Снејк е родум од Париз и без негово знаење песната била пуштена на стадион. Овој 35-годишен музичар бил позитивно изненаден од клупската одлука, и нормално, задоволен.
Диџеј Снејк е и навивач на ПСЖ, бил номиниран за Греми, а трипати победувал на наградите Billboard Music и MTV Music Awards.