Новите два четвртфиналисти се тимовите на ПСЖ и Ливерпул кои синоќа успешно ја одработија предноста од првите натпревари.
ПСЖ имаше високи 4:1 од првиот дуел во каталонската престолнина па синоќа и оние 1:1 му беа доволни за да отпатува во наредната фаза.
Домашните во 31. минута добија удар од белата точка по прегледувањето на снимката со ВАР кога се востанови дека Оскар Мингеса го сопнал Мауро Икарди. Килјан Мбапе беше успешен егзекутор отворајќи го резултатот.
Барселона се врати во игра само шест минути подоцна и тоа со еврогол на Лео Меси откако претходно Усман Дембеле прокоцка колосална шанса.
Во судиското надополнување гостите добија пенал откако Левен Курзава го шутна Антоан Гризман во казнениот простор. Но, Кејлот Навас го одбрани ударот на Меси и Барса прокоцка одлична шанса да замине на полувреме со водство и во вториот дел да брка уште два гола.
Натпреварот заврши со резултатот од првиот дел и ПСЖ со вкупни 5:2 отпатува во четвртфиналето.
Ливерпул и Лајпциг и реваншот го одиграа на „Пушкаш“ стадионот во Будимпешта, а Англичаните победија со истиот резултат како и на првиот дуел, 2:0.
Головите беа постигнати во последните дваесетина минути. Прво Мохамед Салах во 70-тата минута се прошета низ гостинската одбрана и го отвори резултатот, а четири минути подоцна Дивок Ориги одлично му сервираше на Садио Мане кој ги постигна конечните 2:0 или 4:0 вкупен резултат.
Покрај ПСЖ и Ливерпул, неделава пласман во четвртфиналето обезбедија и Порто и Борусија од Дортмунд, а преостанатите четири патника ќе бидат познати наредните вторник и среда.