Шпанската полиција уапси член на службата за безбедност во рамки на истрагата за бегството на поранешниот каталонски претседател Карлес Пуџдемон од Барселона по политички митинг, објавија локалните медиуми.
Уапсениот полицаец е сопственик на автомобилот со кој Пуџдемон побегнал од плоштадот каде се појавил на собир пред зградата на Парламентот во Барселона.
Каталонската полиција потврди дека еден полицаец е уапсен, но други детали не се соопштени.
Поранешниот каталонски претседател се појави порано, и покрај налогот за негово апсење, на митинг во Барселона по седумгодишен самонаметнат егзил, а потоа исчезна, што предизвика полициска истрага.
И покрај силното полициско обезбедување, Пуџдемон им се обрати на толпата од илјадници поддржувачи во каталонската престолнина од бината поставена недалеку од каталонскиот парламент.
„Мислеа дека ќе го прослават моето апсење и дека казната ќе ме обесхрабри. Па, не беа во право“, нагласи Пуџдемон.
По говорот тој ја напушти сцената и полицијата и медиумите не успеаја да го најдат. Потерата по Пуџдемон предизвика сообраќаен колапс во Барселона, додека блокада беше поставена недалеку од границата со Франција.
Подоцна потрагата беше прекината.
Пуџдемон ја предводи партијата Жунтс и беше лидер на Каталонија меѓу 2016 и 2017 година, пред да замине од Шпанија во Белгија по неуспешниот референдум за независност на шпанската покраина.
